Programi
Në kuadër të reformave të demokratizimit të pushtetit vendor dhe procesit të decentralizimit, Akademia e Studimeve Politike (ASP), krahas programit të saj tradicional të trajnimit të lidershipit të ri, ka iniciuar në vitin 2012 një program trajnimi të posaçëm për drejtuesit e Njësive të Qeverisjes Vendore (NJQV). E veçanta e këtij programi qëndron në metodologjinë, ekpertizën e kualifikuar dhe aplikueshmërinë e tematikës së zgjedhur në funksion jo vetëm të njësive vendore në fokus por më së shumti të përmirësimit të shërbimeve për qytetarët dhe mirëqeverisjes në nivel vendor.

Programi ka nisur të zbatohet në bashkëpunim me Institutin e Trajnimit të Administratës Publike (ITAP) dhe konsiston në organizimin e tre kurseve dy ditore dhe vizita informuese në njësitë vendore më të zhvilluara. Në përfundim të kurseve, pjesëmarrësit u pajisën me një certifikatë të lëshuar nga Akademia e Studimeve Politike dhe  Instituti i Trajnimit të Administratës Publike. Këto certifikime regjistrohen në regjistrin zyrtar të ITAP duke bërë të mundur që modulet e zhvilluara të përllogariten në orët e trajnimit që duhet të kryejnë të gjithë punonjësit e administratës vendore për kualifikimin e tyre sipas ligjit të ri të Administratës Publike.

Programi synon gjithashtu që të krijojë komunikim dhe lidhje mes vetë pjesëmarrësve si dhe përfaqësuesve të administrarës qendrore, të cilët shpesh ndeshen me ndasi politike që ndikojnë në shërbimet ndaj qytetarëve.

Cikli i trajnimeve është financuar deri në vitin 2015 falë kontributit të Zyrës së Bashkëpunimit Zviceran në Shqipëri si dhe Fondacionit për një Shoqëri të Hapur për Shqipërinë, OSFA-Soros.

Objektivat specifikë të programit janë:

• rritja e njohurive dhe kapaciteteve të NJQV ne lidhje me principet dhe mirëqeverisjes transparenca, llogaridhënieja ndaj qytetarëve, etika publike, respekti për të drejtat e njeriut;
• nxitja e bashkëpunimit dhe shkëmbimi i praktikave më të mira të vendimmarrjes vendore, menaxhimit transparent, i cili bazohet mbi interesat dhe pjesëmarrjen e publikut, mes drejtuesve vendorë me eksperiencë dhe atyre të zgjedhur pas 8 majit 2011;
• rritja e njohurive dhe mundësisë së përfitimit të NJQV nga financimet e Bashkimit Evropian dhe organizmave të tjera ndërkombëtare, si një mundësi për të shtuar dhe permiresuar investimet dhe shërbimet ndaj qytetarëve.

Organizimi
Programi i trajnimit lindi në përfundim të vlerësimit të nevojave të NJQV-ve në kuadrin e një asistence më të gjerë që Këshilli i Evropës po zbaton në Shqipëri. Si rrjedhojë, duke marrë shkas edhe nga eksperienca e akumuluar nga APS për vite me radhë në organizimin e trajnimeve dhe rrjetit të gjerë dhe të kualifikuar të ish-pjesëmarrësve, u identifikuan një sërë tematikash me vlerë praktike dhe u përzgjodh qasja "peer to peer" për një bashkëveprim dhe nxënje më cilësore, sic janë buxhetimi me pjesëmarrje, aplikimi dhe zbatimi i projekteve të Bashkimit Evropian si dhe planifikimi dhe zhvillimi i qëndrueshëm vendor. Kurset kombinojnë ekspertizën vendore të lektorëve të ftuar së bashku me eksperiencat më të mira të siguruara nga Kongresi i autoriteteve vendore dhe rajonale të Këshillit të Evropës.

Autoritet vendore që marrin pjesë në trajnime shërbejnë gjithashtu si transmetues të eksperiencave më të mira duke sjellë shembujt e zgjidhjes së probelemeve të përbashkëta që kanë NJQV.

Kurset kanë një kohëzgjatje 2 ditore, gjatë fundjavës, ndërkohë që gjatë këtyre ditëve organizohen edhe vizita informuese me pjesëmarrësit e programit pranë bashkive të mëdha të vendit, për t'u njohur me organizimin në praktikë të këtyre njësive vendore.

Përzgjedhja e deri 20 përfaqësuesve (kryetarë bashkie dhe gjithashtu drejtues të administratës) të 15 bashkive, kryhet me një selektim që respekton përfaqësimin politik, gjeografik dhe gjinor të të zgjedhurve të NJQV.